
الطاہر شمارہ نمبر
43 |
اردو مین پیج |
گلہائے رنگ رنگ
سب سے پہلے
-
دنیا کی سب سے عظیم شخصیت حضور اکرم نور مجسم صلّی اللہ علیہ وسلم
-
بچوں میں سب سے پہلے اسلام قبول کرنے والے حضرت علی بن ابی طالب رضی اللہ عنہ
-
اسلام قبول کرنے والی پہلی خاتون حضرت خدیجہ رضی اللہ عنہا
-
اسلام قبول کرنے والے پہلے مر د حضرت ابوبکر صدیق رضی اللہ عنہ
-
اسلام کا پہلا تبلیغی مرکز دار ارقم
-
اسلام کی پہلی شہیدہ سمیہ رضی اللہ عنہا
-
ہجرت مدینہ کے بعد پہلے بچے کی ولادت حضرت عبداللہ بن زبیر رضی اللہ عنہ
(مرسلہ:فقیر شبیر نعمان طاہری ۔طاہری چوک ٹنڈوالہیار)
حدیث مبارک
-
ایک مرتبہ اللہ کے رسول صلّی اللہ علیہ وسلم نے ارشاد فرمایا کہ مؤمن کی مثال اس درخت کی سی ہے جس کے پتے نہیں گرتے، بتاؤ وہ کونسا درخت ہے؟ حاضرین مختلف درختوں کے نام عرض کرنے لگے۔ حضرت سیدنا عبداللہ بن عمررضی اللہ عنہ بہت ذہین تھے، فرماتے ہیں کہ میرے ذہن میں آگیا کہ وہ کھجور کا درخت ہے لیکن میں نے بتانے سے حیا محسوس کی۔ پھر حاضرین نے عرض کی یارسول اللہ صلّی اللہ علیہ وسلم آپ ہی ارشاد فرمائیے۔ حضور صلّی اللہ علیہ وسلم نے فرمایا کہ وہ کھجور کا درخت ہے۔
(مرسلہ :حافظ عبدالشکور خاصخیلی طاہری۔بیلہ)
علم کی روشنی
-
علم کے دریا میں غرق ہونے والے انسان کبھی نہیں ڈوبتے۔
-
علم ایسا پھول ہے جس کی خوشبو ہر طرف محسوس کی جاتی ہے۔
-
علم ایسی شمع ہے جو جتنی جلتی ہے اتنی زیادہ روشنی دیتی ہے۔
-
علم ایسی دولت ہے جو خرچ کرنے سے بڑھتی ہے۔
-
چاند کے بغیر رات بیکار ہے اور علم کے بغیر ذہن بیکار ہے۔
-
علم سے انسان اپنے رب کو پہچانتا ہے۔
(مرسلہ: محمد محسن طاہری، اسلامک سینٹر کراچی)
معلومات کشمیر
-
ارضیات کی تحقیق کے مطابق کشمیر کا علاقہ 10 کروڑ سال قبل وجود میں آیا۔
-
کشمیر میں پہلی باقائدہ حکومت 6 ہزار سال پہلے قائم ہوئی۔
-
دنیا کا مشہور سیاح مارکو پولو 1277ء میں کشمیر آیا۔
-
دنیا میں بہترین یاقوت، زمرد اور ہیرا کشمیر میں پایا جاتا ہے۔
(مرسلہ:فقیر نذیر احمدطاہری۔۔ٹنڈوالہیار)
سائنسی معلومات
-
بلب کا سائنسی نام ”انکینڈیسنٹ Incandicant“ ہے۔
-
ٹیوب لائٹ کو فلوروسینٹ بھی کہتے ہیں۔
-
ٹیوب لائٹ میں مرکری کے ذرات ہوتے ہیں جو کہ موصل کا کردار ادا کرتے ہیں۔
-
بلب کا فلامنٹ ٹنگسٹن کی تار سے بنایا جاتا ہے۔
(عبدالواجد، ملتان)
نسخہ درستی چال چلن
-
سچ کے پھول، دیانتداری کے پھول، عاجزی کے انگور، اتفاق کا ریشم، سادگی کی پنکھڑیاں، پارسائی کا عرق، فرض کا ستو۔ ان سب چیزوں کو یاد الٰہی کی ہانڈی میں ڈال کر محبت کے چولہے پر رکھ کر عشق الٰہی کی آگ جلائیں۔ جب خوب پک جائے تو چھان کر شرافت کی بوتلوں میں بھرلیں۔ ایک تولہ روزانہ رحمدلی کی گلقند کے ساتھ ملاکر انصاف کے چمچے سے نوش فرمائیں۔
(شمائلہ طاہری، 208 رب فیصل آباد)
حدیث
حضرت ابودرداء رضی اللہ عنہ سے روایت ہے کہ رسول اللہ صلّی اللہ علیہ وسلم نے فرمایا۔ کیا میں تم کو وہ عمل نہ بتاؤں جو تمہارے سارے اعمال سے زیادہ بلند کرنے والا ہے اور راہ خدا میں سونا چاندی خیرات کرنے سے بھی زیادہ اس میں خیر ہے۔ صحابہ نے عرض کیا ہاں یا رسول اللہ ایسا قیمتی عمل ضرور بتائیے۔ آپ صلّی اللہ علیہ وسلم نے فرمایا: وہ اللہ کا ذکر ہے۔ (ترمذی، ابن ماجہ)
(مرسلہ :محمدعارف کشمیری طاہری)
انتظار کرے
-
زیادہ کھانے والا بیماری کا۔
-
اوباش یاروں والا بربادی کا۔
-
چغل خوری کرنے والا ذلت ورسوائی کا۔
-
ماں باپ سے نافرمانی کرنے والا اپنی اولاد کی نافرمانی اور مفلسی کا۔
-
ظلم کرنے والا اپنی ہلاکت کا پڑوسی کو تکلیف پہنچانے والا جلد خدا کے قہروعذاب کا۔
(عدیل احمد طاہری۔ٹنڈوالہیار)
ہنسی گھر
مہمان (میزبان سے) ”آپ کا نوکر عجیب آدمی ہے، برابر سیٹی بجائے جارہا ہے، اسے محفل اور مہمان کے آداب کا کچھ پتہ نہیں؟“
کنجوس میزبان ”بھائی یہ میرا ہی حکم ہے، اس طرح مجھے اطمینان رہتا ہے کہ وہ کچھ کھا پی نہیں رہا۔“
ایک دیہاتی کو کسی دھوکے باز نے مسقط لے جانے کے بہانے مری کی پہاڑیوں پر چھوڑ دیا اور کہا ”یہاں سے تین کے فاصلے پر مسقط ہے۔“
تین دن بعد اسے ایک آدمی ملا جس نے ایک بیگ اور بستر اٹھا رکھا تھا دیہاتی نے اس آدمی سے پوچھا ”آپ نے مسقط دیکھا ہے؟“ آدمی نے جواب دیا ”میں خود تین مہینے سے دبئی ڈھونڈ رہا ہوں تم مسقط کی بات کرتے ہو۔“
(مرسلہ:فرحانہ طاہری۔۔یونیورسٹی کالونی نوابشاہ)
ماں کا رتبہ
ایک شخص حضور صلّی اللہ علیہ وسلم کی خدمت میں حاضر ہوا اور عرض کیا حضور مجھ پر سب سے زیادہ حق کس کا ہے؟ حضور صلّی اللہ علیہ وسلم نے فرمایا تیری ماں کا۔ اس شخص نے پھر یہی سوال کیا، حضور صلّی اللہ علیہ وسلم نے فرمایا تیری ماں کا۔ پھر تیسری مرتبہ کیا، آپ صلّی اللہ علیہ وسلم نے فرمایا تیری ماں کا۔ جب چوتھی مرتبہ پوچھا تو آپ صلّی اللہ علیہ وسلم نے فرمایا تیرے باپ کا۔ ماں کا درجہ باپ سے تین گنا ہے۔ ماں بچے کو رات جاگ کر پالتی ہے اور کوئی ماں کا ایک رات کا حق ادا نہیں کرسکتا۔ اور باپ کی ناراضگی میں اللہ تعالیٰ کی ناراضگی ہے۔
(مرسلہ:محمد ذوالفقار طاہری۔میرواہ ناکہ)
ہیرے جواہر
-
دولت مند ہونے سے انسان اپنے آپ کوبھول جاتا ہے اور دولت نہ ہونے سے لوگ اسے بھول جاتے ہیں۔
-
دوستی کا نازک رشتہ کچے دھاگے کی طرح ہوتا ہے دھاگہ ٹوٹ جائے تو جڑ جاتا ہے مگر اس میں گرہ آجاتی ہے۔
-
کسی کو تباہ کرنادنیا کا سب سے آسان کام ہے لیکن کسی کو بنادینا ہی انسانیت کا کارنامہ ہے۔
(مرسلہ: محمد زبیر، محمد شعیب طاہری۔ گلشن بھٹائی کالونی نوابشاہ)
ماچس کی تیلی اور انسان
ماچس کی تیلی کا ایک سر ہوتا ہے مگر اس میں دماغ نہیں ہوتا۔ مگر انسان کے پاس ایک سر بھی ہوتا ہے ایک دماغ بھی۔ ایک تیلی معمولی سی رگڑ پر فورا جل اٹھتی ہے بالکل اسی طرح انسان بھی معمولی سی باتوں پر بغیر سوچے سمجھے تیلی کی طرح بھڑک اٹھتے ہیں اور اپنے جذبات کی رو میں بہہ کر کوئی بڑا نقصان کر بیٹھتے ہیں۔ یہ بھڑکنا اس انسان کی ناکامی کا سبب بنتا ہے۔ دوسرا انسان وہ ہے جو بھڑکنے والی بات پر بھی نہیں بھڑکتا، پہلے ٹھنڈے دماغ سے سوچتا ہے اور پھر مناسب اقدام کرتا ہے۔ ایسا انسان ہمیشہ کامیاب رہتا ہے پہلے انسان کی بنسبت، کیونکہ اس کی حیثیت ایک ماچس کی تیلی سے زیادہ نہیں۔
(گل ناز لاڑک، پنجوڈیرو)
اقوال زریں
-
مسکراہٹ دوستی کی ابتداء ہے۔
-
مسکراہٹ سے چہرے کی خوبصورتی میں اضافہ ہوتا ہے۔
-
مسکراہٹ دل کی کیفیت کا اظہار ہے۔
-
مسکراہٹ خوبصورتی کی علامت ہے اور خوبصورتی زندگی کی علامت ہے۔
-
دوسرے سے مسکرا کے پیش آنا سب سے بڑی نیکی ہے۔
(مرسلہ:محمدیاسین طاہری۔۔عظیم ٹاؤن کراچی)
زندگی کی کرن
عظیم ہیں وہ لوگ جو غربت سے امارت تک زندگی کے کسی بھی مقام پر اپنے سچے جذبات نہیں چھوڑتے۔ وہ اپنی خوشیوں کو دسروں کی خوشیوں پر قربان کردیتے ہیں۔ ان کی خوشی صرف اس بات میں ہوتی ہے کہ ان کی ذات سے دوسروں کو خوشی ہو۔ دوسروں کے معمولی درد سے بھی ان کا دل تڑپ اٹھتا ہے۔ ایسی تڑپ رکھنے والے انسان حقیقی معنوں میں انسان کہلانے کے مستحق ہوتے ہیں۔ اس چند روزہ زندگی کا کیا اعتبار جس کا ناطہ کسی وقت بھی ہم سے ٹوٹ سکتا ہے۔ پھر زندگی پر غرور کیسا؟
(مرسلہ:شکیلہ کنول ۔۔نارووال)
دشمن کے دل میں جگہ بنانا
-
دشمن کوسلام میںپہل کرنا۔
-
دشمن کواچھے نام اور احترام سے پکارنا۔
-
دشمن کو محفل میں جگہ دینا۔
-
دشمن کے دکھ میں شریک ہونا۔
-
ایک خوشی میں دشمن کو شریک کرنا۔
(شازیہ اقبال طاہری۔۔کالج ٹاؤن وہاڑی)
مجلس کے آداب
کسی کے گھر جاؤ تو پہلے سلام کرو، پھر ایک طرف بیٹھ جاؤ اور جب تک وہاں موجود لوگوں کی باتیں نہ سن لو اپنی بات نہ شروع کرو۔ اگر وہ اللہ تعالیٰ کے ذکر میں مشغول ہوں تو تم بھی اللہ کا ذکر شروع کردو۔ اگر فضولیات میں مشغول ہوں تو وہاں سے الگ ہوجاؤ، اور دوسری مجلس جو اچھی ہو اس میں چلے جاؤ۔
(محمد فرحان گلزار طاہری، ٹنڈوالہیار)
چار علامتیں
کسی دانا نے کہا جاہل کی چار علامتیں ہیں:
-
بلاوجہ غصہ کرنا
-
بے موقع اور بلاضرورت مال خرچ کرنا
-
نفس کی پیروی کرنا
-
دوست اور دشمن کو نہ پہچاننا
(مرسلہ:عبدالسمیع طاہری۔میرواہ ناکہ ٹنڈوالہیار)
رسول اللہ صلّی اللہ علیہ وسلم کی پیاری باتیں
دوستی: سچائی پر قائم رہو، سچائی میں نجات ہے۔
امانتداری: جس شخص میں امانتداری نہیں اس میں ایمان نہیں۔
پرہیزگاری: اللہ تعالیٰ کے نزدیک باعزت وہ ہے جو سب سے زیادہ پرہیزگار ہے۔
سادگی: عیش پسندی سے بچو، اللہ کے بندے عیش کو پسند نہیں کرتے۔
توکل: صرف اللہ تعالیٰ پر بھروسہ کرو لیکن اپنی کوشش اور محنت کو نہ چھوڑو۔
(مرسلہ: آسیہ طاہری، چک نمبر 208رب)
گوشہ تبسم
ایک چیونٹی بھاگی بھاگی کہیں جارہی تھی۔ راستے میں ایک گینڈے نے روک کر پوچھا خیریت تو ہے اتنی گھبراہٹ میں کہاں بھاگی جارہی ہو۔ چیونٹی نے پھولی ہوئی سانسوں کے درمیان کہا ہاتھی کا ایکسیڈنٹ ہوگیا ہے اسے چار بوتل خون کی ضرورت ہے میں خون دینے جارہی ہوں۔
(مرسلہ:آسیہ طاہری 208رب فیصل آباد)
ظاہر مت کر
کسی کا عیب، دل کا بھید۔کسی کی امانت، پوری طاقت۔ اپنی تجارت، زیادہ ضرورت۔ راز کی بات، سفر کرنے کی سمت۔
(مرسلہ: حافظ محمد رضوان طاہری، میرواہ ناکہ ٹنڈوالہیار)
اقوال زریں
-
سب سے برا وہ ہے جس کی عمر لمبی ہو لیکن اعمال بد ہوں۔ (حضور اکرم صلّی اللہ علیہ وسلم)
-
عبادت ایک پیشہ ہے، دوکان اس کی خلوت ہے، راس المال اس کا تقویٰ ہے اور نفع اس کا جنت ہے۔ (حضرت ابوبکر صدیق رضی اللہ عنہ)
-
ایمان کے بعد بڑی نعمت نیک بیوی ہے۔ (حضرت عمر فاروق رضی اللہ عنہ)
(مرسلہ :صاحبڈنو طاہری،بندیجا اسٹاپ گڈاپ کراچی)